የእርዳታ ጥሪ                                                                                                                   የተፈናቀሉ ወገኖቻችን እንርዳ!!                                              በሐገራችን ኢትዮጵያ በተለያዩ ቦታዎች ሃብትና ንብረት አፍርተው ይኖሩ በነበሩ ወገኖቻችን ከነበሩበት ቀያቸው ማንነታቸውን መሠረት ያደረገ መፈናቀል፣ ሞትና ለረጅም ዘመናት ሰርተው ያፈሩትን ንብረታቸውን ለውድመት መዳረጉን በጀሮአችን ሰምተናል፤ በአይናችንም አይተናል። ጾታንና እድሜን ሳይለይ እጅግ ቀጥራቸው ብዙ በሆኑ ወገኖቻችን በተለይም አዲሱ የመንግስት የለውጥ አስተዳደር ከምጣ ጀምሮ የተፈጸመው አሰቃቂ ግድያ በዚህ በምንገኝበት ሃያ አንደኛ ክፍለ ዘመን በሰው ልጅ ያውም በራስ ወገን ይፈጸማል ተብሎ በማይታሰብ ኢሰብአዊ በሆነ ሁኔታ መገደላቸውን ስናይ ይበልጥ የሚያሳዝንና ልብ የሚያደማ ሆኖ እናገኘዋለን። ይህ የወገኖቻችን የግፍ መከራና ስቃይ አሁንም ጭካኔና የአውሬነት ባህሪ በተላበሱ እኩያን አማካኝነት ማንነትን መሠረት ያደረገ ጥቃት በተለያዩ የሐገራችን ስፍራዎች በተለይም በመተከልና በኦሮሚያ ክልሎች ተባብሶ ቀጥሏል። በዚህም የተነሳ በእግዚአብሔር እርዳታና ጥበቃ ከአሰቃቂው ሞት የተረፉ ቁጥራቸው ከአንድ መቶ ሽህ በላይ የሚበልጡ ወገኖቻችን ተፈናቅለው በአገዋዊ ዞን አስተዳደር (ቻግኒ ከተማ አካባቢ) በተለያዩ ቦታዎች በጊዜያዊነት ተጠልለው ይገኛሉ። የተፈናቀሉ ዜጎቻችንን ለመርዳትና መልሶ ለማቋቋም መንግስትና በሀገር ቤት የሚገኘው ሕብረተሰባችን የሚያደርጉት ጥረት የሚያስመሰግን ቢሆንም ችግሩ በሁሉም የሐገሪቱ ቦታዎች በስፋት የተከሰተ በመሆኑ የእለት ጉርስ አጥተው የወገኖቻቸውን ድጋፍ የሚጠይቁ እጅግ ብዙ መሆናቸውን በመገናኛ ብዙሃን አማካኝነት ተገልጿል።            ምንም እንኳን በአለማችን የተከሰተው የኮቪድ ወረርሽኝ ያስከተለው ማኅበራዊና ኢኮኖሚያዊ ችግር እጅግ ከፍተኛ ቢሆንም በሕይወት የተረፉትን ወገኖቻችን በዕርዳታ ማጣት ምክንያት በሞት እንዳናጣቸው ለወገን ደራሽ ወገን በመሆኑ አቅማችሁ የሚፈቅደውንና የምትችሉትን ዕርዳታ እንድታደርጉ ቤተ ክርስቲያናችን ጥሪ ታቀርባለች።

ዕርዳታውን በሚከተሉት መንገዶች ይሰበሰባል።

1. በቤተ ክርስቲያኑ ድህረ ገጽ Give የሚለውን በመምረጥ ቀጥለው ኢመርጀንሲ የሚለውን ይምረጡ።
2. በቼክ ለመላክ Debre Hail Kedus Gabriel ብለው በመጻፍ በዚህ አድራሻ ይላኩሉን። 2601 Evarts St. NE  Washington, DC 20018
3. ዘወትር ከሰኞ እስከ እሁድ ከጧቱ 10 ሰዓት እስከ ምሽቱ 6 ሰዓት በቤተ ክርስቲያኑ ስልክ ቁጥር (202) 269-0146 በመደወል ወይንም በአካል በመገኘት ዕርዳያ ማድረግ ይቻላል።

እግዚአብሔር አምላክ ለሐገራችን ሠላምና መረጋጋትን፤ ለሕዝባችን ደግሞ ፍቅርንና አንድነትን እንዲሰጥልን በያለንበት በጸሎት እንድንተጋ የቤተ ክርስቲያኑ አስተዳደር ያሳስባል።

የሰበካ መንፈሳዊ አስተዳደር ጉባኤ